ଯଦି କିଛି ପାଣ୍ଡିଆନ୍ ବୁଝୁନାହାନ୍ତି... ତାହେଲେ ମାମଲତକାର କିଏ? ରାଜ୍ୟସଭା ସାଂସଦ ରୁଷିବା ଯାଏଁ କଥା ଗଲା କାହିଁକି ?

 ଭୁବନେଶ୍ୱର: ଓଡ଼ିଆରେ ଗୋଟିଏ ବହୁ ପ୍ରଚଳିତ ଢଗ ରହିଛି  । ‘ପାଖରେ ଶୁଏ, କାନରେ କହେ, ତା’କଥାକି ଅନ୍ୟଥା ହୁଏ  ।’ ବାହାହେବା ପରେ ପୁଅ କେମିତି ବଦଳିଯାଏ ଓ ବୋହୂ କଥାରେ ସବୁ ଚାଲେ, ତାହାର ଅବତାରଣା କରିବାକୁ ଏହି ରୁଢ଼ିଟି ପ୍ରଚଳିତ  । ବିଜେଡ଼ି ରାଜନୀତିକୁ ଗହୀରେଇ ଅନୁଶୀଳନ କଲେ ଏହି ରୁଢ଼ିଟି ବି ବେଶ୍ ପ୍ରଯୁଜ୍ୟ  । ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କ ପାଖରେ ଛାଇ ଭଳି ରହିଛନ୍ତି ଭିକେ ପାଣ୍ଡିଆନ୍  । ବର୍ଷକ ତଳେ କବାଟ କଣରେ ଲୁଚିଲୁଚି ରହୁଥିଲେ, ଏବେ କିନ୍ତୁ ପଦାକୁ ବାହାରିଲେଣି  । ଖାଲି ସେ ନୁହଁନ୍ତି ତାଙ୍କ ପନôୀ ତଥା ପୂର୍ବତନ ଆଇଏଏସ ଅଫିସର ସୁଜାତା କାର୍ତ୍ତିକେୟନ୍ ବି ରହୁଛନ୍ତି  । କିନ୍ତୁ ପୁଅ ଯେମିତି ସ୍ତ୍ରୀର ଦୋଷ ଘୋଡ଼ାଇବାକୁ ଯାଇ ତାହାର କିଛି ଦୋଷ ନାହିଁ ବୋଲି କୁହେ, ଠିକ୍ ସେମିତି ନବୀନ ବାବୁ କଥାକଥାକେ ପାଣ୍ଡିଆନଙ୍କ ଦୋଷ ନାହିଁ ବୋଲି ଶୁଆ ଘୋଷା କରୁଥିବାର ଅନେକ ନଜିର ରହିଛି  । 
ଏବେ ଆସିବା ମୂଳ ପ୍ରସଙ୍ଗକୁ  । ନବୀନ ବାବୁଙ୍କର ତ ଦେହ ଖରାପ  । ସେ ଏବେ ସମ୍ ହସପିଟାଲରେ ଚିକିତ୍ସିତ ହେଉଛନ୍ତି  । ଏକଥା ସାରା ଓଡ଼ିଶା ଜାଣିଛି  । ଏଭଳି ଏକ ସମୟରେ ବିଜେଡ଼ିର ଏକ ଟିମ୍ ଦିଲ୍ଲୀ ଯାଇ ନିର୍ବାଚନ କମିଶନଙ୍କ ସହ ସାକ୍ଷାତ କଲେ  । ଅବଶ୍ୟ ନିର୍ବାଚନ କମିଶନ ଏନେଇ ବିଜେଡ଼ିକୁ ଚିଠି ଲେଖିଥିବାବେଳେ ଟିମ୍ ବି ଗଢ଼ା ଯାଇଥିଲା  । ସେଥିରେ ଥିଲେ ଦେବୀ ପ୍ରସାଦ ମିଶ୍ର, ସଂଜୟ ଦାସବର୍ମା, ଅମର ପଟ୍ଟନାୟକ, ପ୍ରମିଳା ମଲ୍ଲିକ, ନିରଞ୍ଜନ ପୂଜାରୀ, ଭ୍ରୁଗୁ ବକ୍ସିପାତ୍ର ଓ ସୁଲତା ଦେଓ  । ତେବେ ଆମେ ସମସ୍ତେ ଜାଣିଛେ ଏବେ ସଂସଦ ଚାଲିଛି  । ବିଜେଡ଼ିର ରାଜ୍ୟସଭା ସାଂସଦମାନେ ଦିଲ୍ଲୀରେ  । ଲୋକସଭାରେ ତ ବିଜେଡ଼ିର ଖାତା ଖତିଆନ ଚବିଶ ନିର୍ବାଚନରେ ଉଡ଼ିଯାଇଛି  । ଦଳର ବଳ ହେଉଛନ୍ତି ରାଜ୍ୟସଭା ସାଂସଦ  । ଯେଉଁଥିପାଇଁ ହିଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଲ୍ ପାରିତରୁ ନେଇ ବିଭିନ୍ନ ପ୍ରସଙ୍ଗରେ ବିଜେଡ଼ିର ସହଯୋଗ ଲୋଡ଼ିବାକୁ ବାଧ୍ୟ ହେଉଛନ୍ତି  । ଏମିତିବି ଆଗକୁ ଉପରାଷ୍ଟ୍ରପତି ନିର୍ବାଚନ  । ଇଣ୍ଡି ଓ ଏନଡ଼ିଏ ନିଜର ପ୍ରାର୍ଥୀ ଘୋଷଣା କରିସାରିଛନ୍ତି  । ବିଜେଡ଼ି କାହାକୁ ଭୋଟ୍ ଦେବ ସେ ନିଷ୍ପତ୍ତି ବି ହୋଇନାହିଁ  । ଏଭଳି ସମୟରେ ରାଜ୍ୟସଭା ସାଂସଦମାନଙ୍କୁ ଆଳୁ ବାଇଗଣ ବିଚାରିବା ଆଦୌ ରାଜନୀତିକ ପରିପକ୍ୱତା ବା ବୁଦ୍ଧିମତାର  ପରିଚୟ ନୁହେଁ  । ରାଜ୍ୟସଭା ସାଂସଦମାନେ ଦିଲ୍ଲୀରେ ଥିବାବେଳେ ତାଙ୍କୁ ଡାକିବାର ସୌଜନ୍ୟତା କିଭଳି ବିଜେଡ଼ିର ମାମଲତକାରମାନେ ଭୁଲିଗଲେ  ।
କଥାକଥାକେ କୁହାଯାଉଛି ପାଣ୍ଡିଆନ୍ କିଛି ନିଷ୍ପତ୍ତି ନେଉନାହାନ୍ତି  । ସବୁ ନିଷ୍ପତ୍ତି ନେଉଛନ୍ତି ନବୀନ  । ଆଚ୍ଛା ନବୀନ ଏବେ ହସପିଟାଲ୍ରେ  । ଅସୁସ୍ଥତା ସମୟରେ ସେ କ’ଣ ସତରେ ନିଷ୍ପତ୍ତି ନେଉଛନ୍ତି ? ନବୀନଙ୍କୁ ଯେତେବେଳେ ଦଳର ବରିଷ୍ଠ ନେତାମାନେ ମେଡ଼ିକାଲରେ ଭେଟିପାରୁନାହାନ୍ତି, ଯେତେବେଳେ ସେ ମାନସିକ ଓ ଶାରୀରିକସ୍ତରରେ ଦୁର୍ବଳ ଅଛନ୍ତି ସେତେବେଳେ ସେ ନିଷ୍ପତ୍ତି ନେଉଥିବା କଥାଟା ଆଦୌ ବିଶ୍ୱାସଯୋଗ୍ୟ ବା ଗ୍ରହଣୀୟ ନୁହେଁ  । ତେଣୁ ପାଣ୍ଡିଆନ୍ ଯଦି କିଛି ନିଷ୍ପତ୍ତି ନେଉନାହାନ୍ତି ତେବେ ଦଳରେ ମାମଲତି କିଏ କରୁଛନ୍ତି  । ଦିଲ୍ଲୀରେ ରାଜ୍ୟସଭା ସାଂସଦମାନଙ୍କୁ ନଡ଼ାକିବାକୁ ନବୀନ କହିଥିଲେକି ? ଯେତେବେଳେକି ପୂର୍ବରୁ ବିଜେଡ଼ି ପକ୍ଷରୁ ଇସିଆଇ ଅଭିଯୋଗ କରିବା ବେଳେ ରାଜ୍ୟସଭା ବିଜେଡ଼ି ସଂସଦୀୟ ଦଳ ମୁଖ୍ୟ ସସ୍ମିତ ପାତ୍ର ହିଁ ନେତୃତ୍ୱ ନେଇଥିଲେ  । ଜାତୀୟ ଗଣମାଧ୍ୟମକୁ ଦ୍ଭ ୭ ପୃଷ୍ଠାରେ...