ମୁଖ୍ୟମନ୍ତ୍ରୀଙ୍କୁ ସ୍ମାରକପତ୍ର ଦେବାର ୬ମାସ ବିତିଲା : ହେଉନି ସମସ୍ୟାର ସମାଧାନ, ନିରାଶ ଜନତା

 ଢେଙ୍କାନାଳ : ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗତ ୬ ମାସ ତଳେ ପ୍ରଥମ କରି ଢେଙ୍କାନାଳ ଗସ୍ତରେ ଆସିଥିବା ବେଳେ ବିଭିନ୍ନ ଅନୁଷ୍ଠାନ ପକ୍ଷରୁ ମିଳିତ ଭାବେ ଜିଲ୍ଲାର ସ୍ୱାର୍ଥ ସମ୍ବନ୍ଧୀୟ ଏକ ଦାବିପତ୍ର ଦିଆଯାଇଥିଲା । ମାତ୍ର ତାହା ଉପରେ ସରକାର ଆଜି ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବାରୁ ତାକୁ ନେଇ ଜିଲ୍ଲା ସକ୍ରିୟ ନାଗରିକ ପରିଷଦର ସଭାପତି ପ୍ରଦୁ୍ୟମ୍ନ ରଥ ଅସନ୍ତୋଷ ପ୍ରକାଶ କରିବା ସହିତ ଶୀଘ୍ର ପଦକ୍ଷେପ ନେବା ପାଇଁ ଅନୁରୋଧ କରିଛନ୍ତି । 
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ପ୍ରଥମ ଢେଙ୍କାନାଳ ଗସ୍ତ ଗତ ଅକ୍ଟୋବର ୨୧ତାରିଖ ଦିନ ହୋଇଥିଲା । ଏହି ସମୟରେ ଢେଙ୍କାନାଳ ଜିଲ୍ଲାର ସ୍ୱାର୍ଥ ଜଡିତ ୮ଦଫା ଦାବି ସମ୍ବଳିତ ଏକ ସ୍ମାରକପତ୍ର ୭ଟି ଅନୁଷ୍ଠାନ ପକ୍ଷରୁ ମିଳିତ ଭାବେ ମୁଖ୍ୟମନ୍ତ୍ରୀଙ୍କୁ ଢେଙ୍କାନାଳ ସର୍କିଟ୍ ହାଉସ୍ ଠାରେ ଜିଲ୍ଲା ସକ୍ରିୟ ନାଗରିକ ପରିଷଦର ସଭାପତି ପ୍ରଦୁ୍ୟମ୍ନ ରଥଙ୍କ ନେତୃତ୍ୱରେ ପ୍ରଦାନ କରାଯାଇଥିଲା ।  ଲୋକଙ୍କ ନିକଟତର ଏହି ସରକାର ଦାବି ଗୁଡିକର ସୁବିଚାର କରିବେ ଏବଂ ଏ ସଂକ୍ରାନ୍ତରେ ପତ୍ର ମାଧ୍ୟମରେ ଅବଗତ କରାଇବେ ବୋଲି ଆଶା କରାଯାଉଥିଲା । କିନ୍ତୁ ଏ ଭିତରେ ଦୀର୍ଘ ୬ମାସ ବିତିଗଲାଣି, ମୁଖ୍ୟମନ୍ତ୍ରୀଙ୍କ ଦପ୍ତରରୁ କୌଣସି ପ୍ରାପ୍ତି ସ୍ୱୀକାର କି ଦାବିଗୁଡିକ ସଂପର୍କରେ କିଛି ବି ଅବଗତ କରାଗଲା ନାହିଁ । ପ୍ରଦତ୍ତ ସ୍ମାରକପତ୍ରରେ ଜିଲ୍ଲାରେ ୯ଟି ନୂତନ ବିଜ୍ଞାପିତ ଅଂଚଳ ପ୍ରତିଷ୍ଠାର ପ୍ରକ୍ରିୟା ଆରମ୍ଭ କରିବା, ଢେଙ୍କାନାଳ ପୌରପାଳିକାର ସୀମା ବୃଦ୍ଧି କରି ବୃହତର ଢେଙ୍କାନାଳ ସହର ଗଠନ କରିବା, ଅବହେଳିତ କପିଳାସ ଚିଡିଆଖାନାକୁ ଦ୍ୱିତୀୟ ନନ୍ଦନକାନନର ମାନ୍ୟତା ଦେଇ ଏହାର ଯଥାଯଥ ଅଭିବୃଦ୍ଧି ଘଟାଇବା, ଷୋଡଶ ଶତାବ୍ଦୀର କୀର୍ତ୍ତି କପିଳାସ ଶ୍ରୀ ଚନ୍ଦ୍ରଶେଖର ଜୀଉଙ୍କ ପୀଠର ଆଖିଦୃଶିଆ ଉନ୍ନତିକରଣ କରାଯିବା, ଢେଙ୍କାନାଳର ଶତାୟୁ ବିଦ୍ୟାଳୟ ବ୍ରଜନାଥ ବଡଜେନା ଉଚ୍ଚ ବିଦ୍ୟାଳୟକୁ ଐତିହ୍ୟ ବିଦ୍ୟାଳୟର ମାନ୍ୟତା ଦିଆଯାଇ ଏଠାରେ +୨ ଅଧ୍ୟୟନର ସୁବିଧା କରିବା, ଢେଙ୍କାନାଳ ଜିଲ୍ଲାର ଉଚ୍ଚ ଶିକ୍ଷାନୁଷ୍ଠାନଗୁଡିକୁ ନେଇ ଏକ ବିଶ୍ୱ ବିଦ୍ୟାଳୟ ପ୍ରତିଷ୍ଠା କରିବା, ଭେଷଜ ମହାବିଦ୍ୟାଳୟ ପ୍ରତିଷ୍ଠା କାର୍ଯ୍ୟକୁ ତ୍ୱରାନ୍ୱିତ କରିବା ସହ କେଉଁ ସମୟରୁ ଏହା କାର୍ଯ୍ୟକ୍ଷମ ହେବ ତାହା ସ୍ପଷ୍ଟ କରିବା, କପିଳାସ ପୀଠରେ ରୋପ୍ ୱେ ପ୍ରକଳ୍ପ କାର୍ଯ୍ୟକାରୀ କରିବା, କପିଳାସର ଶ୍ରୀ ଚନ୍ଦ୍ରଶେଖର ଜୀଉ, ସପ୍ତଶଯ୍ୟାର ଶ୍ରୀ ରଘୁନାଥଜୀଉ ଓ ଢେଙ୍କାନାଳ ସହର ସ୍ଥିତ ଶ୍ରୀ ସିଦ୍ଧ ବଳରାମଙ୍କ ମନ୍ଦିରକୁ ନେଇ ସ୍ୱତନ୍ତ୍ର ଉନ୍ନୟନ ବୋର୍ଡ ଗଠନ ପୂର୍ବକ ଏହାର କାର୍ଯ୍ୟ ନିର୍ବାହୀ ଅଧିକାରୀ ଭାବେ ଜଣେ ଓଡିଶା ପ୍ରଶାସନିକ ସେବା ଅଧିକାରୀଙ୍କୁ ନିଯୁକ୍ତି ଦେବା ଆଦି ପ୍ରସଙ୍ଗ ଉଲ୍ଲେଖ କରାଯାଇଥିଲା । ଏହାର ଉତ୍ତର ଏଯାବତ ୬ମାସ ବିତିଯାଇଥିଲେ ବି ଜନସାଧାରଣଙ୍କୁ ମିଳିପାରି ନାହିଁ । ଓଡିଆ ଅସ୍ମିତା, ଓଡିଆ ଗୌରବ ଓ ଓଡିଆ ବିକାଶ କଥା କୁହାଯାଉଥିବାବେଳେ ରାଜ୍ୟର କେନ୍ଦ୍ର ସ୍ଥଳରେ ଅବସ୍ଥିତ ଏହି ଆକାଂକ୍ଷୀ ଜିଲ୍ଲାର ବିକାଶକୁ ଲୋକାଭିମୁଖୀ ସରକାର କିଭଳି ଭୁଲିଯାଉଛନ୍ତି ତାହା ଅତ୍ୟନ୍ତ ପରିତାପର ବିଷୟ ବୋଲି ସାଧାରଣରେ ଚର୍ଚ୍ଚା ହେଉଛି । ଢେଙ୍କାନାଳ ଜିଲ୍ଲା ସକ୍ରିୟ ନାଗରିକ ପରିଷଦ, ଶ୍ରୀ ଜଗନ୍ନାଥ ସେବା ପରିଷଦ, ଢେଙ୍କାନାଳ ପଦ୍ମଭୂଷଣ ଡଃ. ରାଧାନାଥ ରଥ ଜୟନ୍ତୀ କମିଟି, ଜିଲ୍ଲା ସର୍ବୋଦୟ ମଣ୍ଡଳ, ଅକ୍ଷମ କଲ୍ୟାଣ ସମିତି, ମହାରାଜା ଭଗିରଥ ମହିନ୍ଦ୍ର ବାହାଦୂର ଫାଉଣ୍ଡେସନ୍ ଓ ଜିଲ୍ଲା ବରିଷ୍ଠ ସାମ୍ବାଦିକ ସଂଘ ଆଦି ୭ଟି ଅନୁଷ୍ଠାନ ପକ୍ଷରୁ ମିଳିତ ଭାବେ ପ୍ରସ୍ତୁତ ଏହି ସ୍ମାରକ ପତ୍ର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସିଧାସଳଖ ପ୍ରଦାନ କରାଯାଇଥିଲା ।