କର୍କଟ ରୋୀଗୀଙ୍କ ବର୍ଦ୍ଧିଷ୍ଣୁ ସଂଖ୍ୟା ଉଦବେଗଜନକ

ଏବେ ବିଶ୍ୱରେ କର୍କଟ ରୋଗୀଙ୍କ ସଂଖ୍ୟା ଯେପରି ବଢିଚାଲିଛି, ତାହା କ୍ରମଶଃ ମହାମାରୀ ରୂପ ଧାରଣ କରିବା ଆଭିମୁଖ୍ୟ ଅଗ୍ରସର ହେଉଛି ବୋଲି କହିଲେ ହୁଏତ ଭୁଲ ହୋଇନପାରେ । ଏକ ସ୍ୱାସ୍ଥ୍ୟ ରିପୋର୍ଟରୁ ଜଣାଯାଇଛି ଯେ, କେବଳ ପୂର୍ବ ଭୂମଧ୍ୟ ଅଂଚଳରେ ପ୍ରତିବର୍ଷ ସାଢେ ୪ଲକ୍ଷରୁ ଅଧିକ ଲୋକଙ୍କର ଜୀବନ କର୍କଟ ନେଉଛି । ତେବେ ଭାରତ ଏବଂ ଓଡିଶାରେ ମଧ୍ୟ ଏହି କର୍କଟ ରୋଗୀଙ୍କ ସଂଖ୍ୟା କିଛି କମ୍‌ ନୁହେଁ । ଭାରତୀୟ ଆୟୁର୍ବିଜ୍ଞାନ ଅନୁସନ୍ଧାନ ପରିଷଦ (ଆଇସିଏମଆର)ର ଜାତୀୟ କର୍କଟ ପଞ୍ଜୀକରଣ କାର୍ଯ୍ୟକ୍ରମ ଅନୁଯାୟୀ, ଦେଶର ବିଭିନ୍ନ ରାଜ୍ୟ ଓ କେନ୍ଦ୍ରଶଶସିତ ଅଞ୍ଚଳରେ କର୍କଟ ଆକ୍ରାନ୍ତଙ୍କ ସଂଖ୍ୟା ବର୍ଷକୁ ବର୍ଷ ବୃଦ୍ଧି ପାଇବାରେ ଲାଗିଛି । ଆଇସିଏମଆରର ଜାତୀୟ କର୍କଟ ପଞ୍ଜୀକରଣ କାର୍ଯ୍ୟକ୍ରମ ରିପୋର୍ଟ ଅନୁଯାୟୀ ଦେଶରେ ୨୦୨୦ରେ ୧୩,୯୨,୧୭୯ କର୍କଟ ପିଡିତ ଥିବାବେଳେ ୦୨୧ରେ ୧୪,୨୭,୪୪୭ ଓ ୨୦୨୨ରେ ଆକ୍ରାନ୍ତଙ୍କ ସଂଖ୍ୟା ୧୪,୬୧,୪୨୭କୁ ବୃଦ୍ଧି ପାଇଥିଲା । ସେହିପରି ଦେଶରେ ଏହି ୩ବର୍ଷ ମଧ୍ୟରେ ଯଥାକ୍ରମେ ୭,୭୦,୨୩୦ଜଣଙ୍କର ମୃତ୍ୟୁ ୭,୮୯,୨୦୨ଜଣଙ୍କର ଏବଂ ୮,୦୮,୫୫୮ ଜଣଙ୍କ ମୃତ୍ୟୁ ଘଟିଥିଲା । କେବଳ ଏତିକି ନୁହେଁ, ପଞ୍ଜାବ, ହରିଆନା, ହିମାଚଳ ପ୍ରଦେଶ ଓ ଚଣ୍ଡିଗଡରେ ସର୍ବାଧିକ କର୍କଟ ପୀଡିତ ଥିବାବେଳେ ସେମାନଙ୍କର ସଂଖ୍ୟା ମଧ୍ୟ ବଢିଚାଲିଛି । ଆମ ରାଜ୍ୟରେ ଶିଶୁକର୍କଟ ରୋଗୀଙ୍କ ସଂଖ୍ୟା ଉଦବେଗଜନକ । ପ୍ରାୟ ୫୦ହଜାର ଶିଶୁ ଆକ୍ରାନ୍ତ ହୋଇଥିବା କୁହାଯାଇଛି ।  ପ୍ରକାଶିତ ଏକ ରିପୋର୍ଟ ଅନୁଯାୟୀ ପଞ୍ଜାବରେ ପ୍ରତି ୧ଲକ୍ଷ ଲୋକରେ ୯୦ଜଣ କର୍କଟ ପିଡିତ । ଗତ ୭ବର୍ଷ ମଧ୍ୟରେ ହାରାହାରି ୭.୫୮୬ ନୂଆ କର୍କଟ ରୋଗୀ ଚିହ୍ନଟ ହେଉଛନ୍ତି ।  ଆମ ରାଜ୍ୟରେ କର୍କଟ ରୋଗୀଙ୍କ ସଂଖ୍ୟା ମଧ୍ୟ କିଛି କମ ନୁହେଁ । ୨୦୧୯-୨୦ରୁ ୨୦୨୧-୨୨ ମଧ୍ୟରେ ରାଜ୍ୟରେ ୯୨,୬୯୯ ଜଣ କର୍କଟ ରୋଗୀ ବିଭିନ୍ନ ହସପିଟାଲରେ ଚିକିତ୍ସିତ ହେଉଥିବାବେଳେ ୩୧,୬୯୨ଜଣଙ୍କର ମୃତ୍ୟୁ ଘଟିଥିବା ବିଧାନସଭାରେ ଗତ ବର୍ଷ ସ୍ୱାସ୍ଥ୍ୟମନ୍ତ୍ରୀ ସୂଚନା ଦେଇଥିଲେ । ତେବେ ବେସରକାରୀ ରିପୋର୍ଟରେ ଏହି ସଂଖ୍ୟା ଆହୁରି ଅଧିକ ଏଥିରେ ସନ୍ଦେହ ନାହିଁ । ଆମ ରାଜ୍ୟରେ ଏହି ମାରାତ୍ମକ ଦୁରାରୋଗ୍ୟ ବ୍ୟାଧିରେ ବାର୍ଷିକ ହାରାହାରି ୫୦ହଜାରରୁ ଅଧିକ ଲୋକ ଆକ୍ରାନ୍ତ ହେଉଥିବାବେଳେ ୧୫ହଜାରରୁ ଅଧିକ ଲୋକଙ୍କର ମୃତ୍ୟୁ ଘଟୁଛି । ରାଜ୍ୟରେ ପୁରୁଷ ଲୋକମାନେ ମୁଖ୍ୟତଃ ମୁଖ କର୍କଟରେ ପୀଡିତ ହେଉଥିବାବେଳେ ମହିଳାଙ୍କ କ୍ଷେତ୍ରରେ ସ୍ତନକର୍କଟ ଅଧିକ ପରିମାଣରେ ଦେଖାଯାଏ ।  ଆମ ଦେଶରେ କର୍କଟରେ ପୀଡିତ ରୋଗୀଙ୍କ ମଧ୍ୟରୁ ୪୦ରୁ ୫୦ ପ୍ରତିଶତ ହେଉଛନ୍ତି ମୁଖ ଗହ୍ୱର କର୍କଟ ରୋଗୀ । ମୁଖ କର୍କଟର ମୁଖ୍ୟ କାରଣ ହେଉଛି ତମାଖୁ ଓ ଗୁଟଖା ସେବନ । ତମାଖୁ, ଗୁଟଖା  ଧୂମପାନ ଆଦି ଦ୍ରବ୍ୟରେ ବୈଧାନିକ ସତର୍କତା ସତ୍ୱେ ଏହାର ସେବନ ବଢି ଚାଲିଛି  । ଯଦି ଏହାକୁ ନିୟନ୍ତ୍ରଣ କରାଯାଇପାରନ୍ତା, ତେବେ ୪୦ପ୍ରତିଶତ ମୁଖ ଗହ୍ୱର କର୍କଟ ରୋଗୀଙ୍କ ସଂଖ୍ୟା କମିଯିବ, ଏଥିରେ ସନ୍ଦେହ ନାହିଁ । ସେହିପରି କର୍କଟ ରୋଗର ଆଉ ଏକ କାରଣ ହେଉଛି, କୀଟ ନାଶକ ଔଷଧର ବହୁଳ ବ୍ୟବହାର । ଏବେ ସମସ୍ତେ ପନିପରିବା, ଧାନ, ମୁଗ, ଗହମ, ଆଖୁ ଆଦି ଫସଲରୁ ରୋଗ ଦାଉରୁ ରକ୍ଷା ପାଇଁ ବହୁଳ ଭାବରେ କୀଟନାଶକ ଔଷଧ ବ୍ୟବହାର ହୋଉଛି ।  ରାଜ୍ୟର ଭାତହାଣ୍ଡି ଭାବେ ପରିଚିତ ବରଗଡ ଜିଲ୍ଲାରେ କର୍କଟ ରୋଗୀଙ୍କ ସଂଖ୍ୟା ବୃଦ୍ଧି ପଛରେ ଅତ୍ୟଧିକ ରସାୟନିକ ସାର ବ୍ୟବହାର ଓ କୀଟନାଶକ ଔଷଧ ଫସଲରେ ବ୍ୟବହାର ବୋଲି କୁହାଯାଇଛି । ବାସ୍ତବ କ୍ଷେତ୍ରରେ ଦେଖିବାକୁ ଗଲେ, ଆମ ଦେଶରେ ବ୍ୟବହୃତ ୨୩୪ଟି ପଞ୍ଜିକୃତ ରାସାୟନିକ ଔଷଧ ମଧ୍ୟରୁ ଅନେକ ଏହାର ମାରାତ୍ମକ ପ୍ରଭାବ ଯୋଗୁଁ ବିଦେଶରେ ନିଷିଦ୍ଧ ହୋଇଥିବାବେଳେ ଆମେ ସେଗୁଡିକୁ ଅତ୍ୟଧିକ ମାତ୍ରାରେ ବ୍ୟବହାର କରିଚାଲିଛୁ । ଏହାର ପ୍ରଭାବରେ କେବଳ ଖାଦ୍ୟ ନୁହେଁ, ଜୀବନରକ୍ଷାକାରୀ ଜଳ, ମାଟି, ପବନ ସବୁକିଛି ବିଷାକ୍ତ ହୋଇଯାଇଛି ।  ଏହା ସତ୍ୟ ଯେ, ପ୍ରାଥମିକ ପର୍ଯ୍ୟାୟରେ ରୋଗ ଚିହ୍ନଟ ହୋଇପାରିଲେ, ରୋଗୀ ସମ୍ପୂର୍ଣ୍ଣ ସୁସ୍ଥ ହୋଇଯିବ, ଏଥିରେ ସନ୍ଦେହ ନାହିଁ । ତେବେ ରୋଗ ସମ୍ପର୍କରେ ବ୍ୟାପକ ସଚେତନତା ଜରୁରି । ତମାଖୁ, ସିଗାରେଟ, ମଦ ଆଦି ମାଦକ ଦ୍ରବ୍ୟ ଉପରେ ବୈଧାନିକ ଚେତାବନୀ ରହିଛି । ଏପରିକି କଙ୍କଡାବିଛା(କର୍କଟ)ର ଛବି ରହିଛି । ଯାହାକି ମାରାତ୍ମକ କର୍କଟ ରୋଗର ଚେତାବନୀ ।  ଏହା ସତ୍ତେ୍ୱ ଜାଣିନଜାଣିବା ପରି ଲୋକ ତମାଖୁ, ସିଗାରେଟ ମଦ ଛାଡିପାରିନାହିଁ । ଯାହାକି କର୍କଟ ରୋଗର ବାହକ ।