ଅବ୍ୟବସ୍ଥା ଘେରରେ ଗୋପାଳପୁର ବିଦ୍ୟାଳୟ

 କେନ୍ଦୁଝର : ସଦର ବ୍ଲକ ଅଧିନସ୍ଥ ଗୋପାଳପୁର ସ୍ଥିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ଏବଂ ଏହାର ଛାତ୍ରାବାସ ସମସ୍ୟା ଘେରରେ ରହିଛି । ଏହି ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମୋଟ ୨୧୮ଜଣ ଛାତ୍ରଛାତ୍ରୀ ପାଠ ପଢୁଥିବାବେଳେ ସେଥିମଧ୍ୟରୁ ୧୪୫ ଜଣ ଛାତ୍ରାବାସରେ ରହି ପାଠ ପଢୁଛନ୍ତି । ଏହି ଉଚ୍ଚ ବିଦ୍ୟାଳୟ ବ୍ୟାପକ ଅବ୍ୟବସ୍ଥାରେ ଚାଲିଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି । ବିଦ୍ୟାଳୟରେ ଏତେ ସଂଖ୍ୟକ ପାଠ ପଢିବା ପାଇଁ ଏଠାରେ ଆବଶ୍ୟକ ଶ୍ରେଣୀ ଗୃହ ସହିତ ଶୋøଚଳୟ ବ୍ୟବସ୍ଥା ନାହିଁ । ସେହିପରି ଖରାଦିନରେ ଆବଶ୍ୟକତା ଅନୁଯାୟୀ ବୋରୱେଲରେ ପାଣି ଆସୁନଥିବାରୁ ଅନ୍ତେବାସୀ ହଇରାଣ ହେଉଛନ୍ତି । ସ୍କୁଲ କ୍ୟାମ୍ପସ ବାହାରେ ଥିବା ଏକ ବୋରୱେଲରୁ ମୋଟର ଲଗାଯାଇ ହଷ୍ଟେଲକୁ ପାଣି ଅଣାଯାଉଛି । ଏହି ବିଦ୍ୟାଳୟର ଅନ୍ତେବାସୀମାନଙ୍କ ପାଇଁ ମଧ୍ୟ ଦିଆଯାଉଥିବା ଖାଦ୍ୟ ନିମ୍ନମାନର ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ଏଠାରେ ବାଳିକା ଛାତ୍ରାବାସ ଦାୟିତ୍ୱରେ ଥିବା ଶିକ୍ଷୟିତ୍ରୀ ସାରଦା ପାତ୍ର ଛାତ୍ରୀନିବାସରେ ନ ରହି ବାହାରୁ ଯିବା ଆସିବା କରୁଛନ୍ତି । ଫଳରେ ଏତେ ସଂଖ୍ୟକ ଅନ୍ତେବାସୀଙ୍କ ଦାୟିତ୍ୱ କେବଳ ମାଟ୍ରନ ଏବଂ ସିସିଏ ଙ୍କ ହାତରେ ଛାଡି ଦେଇ ଅରକ୍ଷିତକୁ ଦଇବ ସାହା ଭଳି ଅବସ୍ଥା ହୋଇଛି । ଛାତ୍ରୀନିବାସ ଦାୟିତ୍ୱ ରୋଟେସନ କରି ଅନ୍ୟ ଶିକ୍ଷୟିତ୍ରୀମାନଙ୍କୁ ଦେବାର ନିୟମ ଥିଲେ ମଧ୍ୟ ଏହା ପାଳନ ହେଉନାହିଁ । ବିଦ୍ୟାଳୟରେ ଗ୍ୟାସ ରୋଷେଇ କରିବାର ନିୟମ ଥିବାବେଳେ ଏହି ବିଦ୍ୟାଳୟରେ ଛାତ୍ରୀନିବାସ ରୋଷେଇରେ ଜାଳେଣି କାଠ ବ୍ୟବହାର ହେଉଛି । ଆବଶ୍ୟକସ୍ଥଳେ ପାଶ୍ୱର୍ବର୍ତ୍ତୀ ଜଙ୍ଗଲରୁ ଲୋକମାନଙ୍କ ଦ୍ୱାରା ଜାଳେଣୀ କାଠ ଅଣାଯାଇ ରୋଷେଇ କରାଯାଉଛି । ୪୦ଶଯ୍ୟା ବିଶିଷ୍ଟ ସ୍ୱଳ୍ପବ୍ୟୟୀ ବାଳକ ଛାତ୍ରାବାସରେ ଏବଂ ୧୦୦ ଶଯ୍ୟା ବିଶିଷ୍ଟ ଛାତ୍ରୀନିବାସରେ ରୋଷେଇ ଅଲଗା ଅଲଗା ହେବାର ନିୟମ ଥିବାବେଳେ ଗୋଟିଏ ସ୍ଥାନରେ ରୋଷେଇ କରାଯାଉଛି । ଛାତ୍ରାବାସ ରୋଷେଇ ସମୟରେ ରୋଷେୟାମାନେ ଯେଉଁ ଖାଦ୍ୟ ସାମଗ୍ରୀ ନେଲେ ତାହା ଗୋଟିଏ ଲଗ୍ ବୁକରେ ଲିପିବଦ୍ଧ ହୋଇ ରୋଷେୟାମାନଙ୍କ ଦ୍ୱାରା ଦସ୍ତଖତ ହେବାର ନିୟମ ଥିଲେ ମଧ୍ୟ ଏଠାରେ ତାହା କରାଯାଉନଥିବା ଜଣାପଡିଛି । ପ୍ରକୃତରେ ଅନ୍ତେବାସୀମାନେ ଯେଉଁ ପରିମାଣର ଚାଉଳ ଖାଉଛନ୍ତି ତାହାଠାରୁ ଅଧିକ ପରିମାଣ ଖର୍ଚ୍ଚ ହେଉଥିବା ଦର୍ଶାଯାଇ ପ୍ରତିମାସ ମୋଟା ପରିମାଣର ଚାଉଳ ବିକ୍ରୀ ହେଉଥିବା ଅଭିଯୋଗ ହୋଇଛି ।  ଛାତ୍ରାବାସ ପାଇଁ ଆବଶ୍ୟକ ପରିମାଣର ଖାଦ୍ୟ ସାମଗ୍ରୀ ଏବଂ ପନିପରିବା ଷ୍ଟୋର ରୁମରେ ଗଚ୍ଛିତ ରଖାଯାଉନାହିଁ । ମେନୁ୍ୟ ଚାଟ ଅନୁସାରେ ଅନ୍ତେବାସୀଙ୍କୁ ଖାଦ୍ୟ ଦିଆଯାଉନାହିଁ । ବିଦ୍ୟାଳୟର ମୁଖ୍ୟ ଫାଟକ ଟି ଭାଙ୍ଗି ଯାଇଥିବାବେଳେ ସେଠାରେ କମ୍ ଉଚ୍ଚତାରେ ପାଚେରୀ ନିର୍ମାଣ ହୋଇଥିବାରୁ ଛାତ୍ରୀନିବାସ ଅସୁରକ୍ଷିତ ମନେ ହେଉଛି । ଏ ନେଇ ପ୍ରଧାନ ଶିକ୍ଷକ ଶୁକଦେବ ଦାସଙ୍କୁ ପଚାରିବାରୁ ହଷ୍ଟେଲ ଦାୟିତ୍ୱରେ ଥିବା ଛାତ୍ରୀନିବାସ ପରିଚାଳିକା ବାହାରେ ରହି ଯିବା ଆସିବା କରୁଥିବା ସ୍ୱୀକାର କରିଛନ୍ତି । ସେହିପରି ଆଉ ଏକ ଅଭିଯୋଗରୁ ଜଣାପଡିଛି ପ୍ରଧାନ ଶିକ୍ଷକ ସରକାରଙ୍କ ଠାରୁ ନିଜ ମୂଳ ବେତନର ୪%ହାରରେ ଘର ଭଡା ପାଉଥିଲେ ମଧ୍ୟ ଭଡା ଗୃହ ନ ନେଇ ସ୍କୁଲ ପରିସରରେ ରହୁଛନ୍ତି । ଯେଉଁମାନେ ସରକାରଙ୍କ ଗୃହକୁ ବାସପୋଯୋଗୀ କରନ୍ତି ସେମାନେ ଘରଭଡା ନେବାର ନିୟମ ନଥିବାବେଳେ ପ୍ରଧାନ ଶିକ୍ଷକ ମୋଟା ଅଙ୍କର ଘର ଭଡା ନେବା ସରକାରଙ୍କ ନିୟମକୁ ଖୋଲାଖୋଳି ଉଲ୍ଲଘଂନ ବୋଲି ଅଭିଯୋଗ ହୋଇଛି । ପ୍ରଧାନ ଶିକ୍ଷକ ସ୍କୁଲରେ ରହିବା ଫଳରେ ସ୍କୁଲର ପାଣି ଏବଂ ବିଦୁ୍ୟତ ବ୍ୟବହାର କରୁଛନ୍ତି । ଏହି ବିଦ୍ୟାଳୟରେ ଥିବା ଛାତ୍ରୀନିବାସକୁ ଜିଲ୍ଲାସ୍ତରୀୟ ଅଧିକାରୀ ତଥା ମଙ୍ଗଳ ସଂପ୍ରସାରଣ ଅଧିକାରଙ୍କ ନିୟମିତ ପରିଦର୍ଶନ କରୁନଥିବାରୁ ଏଭଳି ଅବ୍ୟବସ୍ଥା ଦିନକୁ ଦିନ ବଢିବାରେ ଲାଗିଛି । ଏ ନେଇ ଜିଲ୍ଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ବରିହାଙ୍କ ସହ ଯୋଗଯୋଗ କରିବାରୁ ଅଭିଯୋଗର ଯାଂଚ କରାଯାଇ ପଦକ୍ଷେପ ନିଆଯିବ ।