ପାକ୍କୁ ସ୍ଥଳସେନା ମୁଖ୍ୟଙ୍କ ଚେତାବନୀ : ଆତଙ୍କବାଦୀ ସମର୍ଥକଙ୍କୁ ଦୃଢ ଜବାବ ଦେବୁ
Henamanjaree Swain
ନୂଆଦିଲ୍ଲୀ : ଆତଙ୍କବାଦୀ ଓ ସେମାନଙ୍କ ସମର୍ଥକଙ୍କୁ ତାଙ୍କରି ଭାଷାରେ ଦୃଢ ଜବାବ ଦେବୁ । ଆଜି ଏପରି କହିଛନ୍ତି ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ । ଦେଶ ଯେକୌଣସି ଆତଙ୍କବାଦ କାର୍ଯ୍ୟର ଦୃଢ଼ ଜବାବ ଦେବ । ଭାରତ ପ୍ରଗତି ଓ ବିକାଶ ପାଇଁ ପ୍ରତିବଦ୍ଧ । କିନ୍ତୁ ଯେଉଁମାନେ ଏହାର ପଥ ଭ୍ରଷ୍ଟ କରିବାକୁ ଚେଷ୍ଟା କରିବେ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ପଛାଇବ ନାହିଁ ବୋଲି ପାକିସ୍ତାନ ଉଦ୍ଦେଶ୍ୟରେ ଏକ ଦୃଢ ବାର୍ତ୍ତା ଦେଇଛନ୍ତି ।
ନୂଆଦିଲ୍ଲୀର ଦୀର୍ଘକାଳୀନ ମନୋଭାବକୁ ଦୋହରାଇ ସେ ଆହୁରି କହିଛନ୍ତି, ଆଲୋଚନା ଓ ଆତଙ୍କ ଏକାଠି ଚାଲିପାରିବ ନାହିଁ; ରକ୍ତ ଓ ପାଣି ଏକାଠି ପ୍ରବାହିତ ହୋଇପାରିବ ନାହିଁ । ଆମେ ଏକ ଶାନ୍ତିପୂର୍ଣ୍ଣ ପ୍ରକ୍ରିୟାକୁ ସମର୍ଥନ କରୁ ଓ ଏଥିରେ ସହଯୋଗ କରିବୁ । ସେପର୍ଯ୍ୟନ୍ତ, ଆମେ ଆତଙ୍କବାଦୀ ଓ ସେମାନଙ୍କର ପ୍ରାୟୋଜକଙ୍କ ସହିତ ସମାନ ବ୍ୟବହାର କରିବୁ । ପାକିସ୍ତାନର ପରମାଣୁ ସ୍ଥିତି ପ୍ରତି ଇଙ୍ଗିତ କରି ଜେନେରାଲ ଦ୍ୱିବେଦୀ କହିଛନ୍ତି ଯେ ଭାରତ ଆଉ ରଣନୈତିକ ବଳପ୍ରୟୋଗ ପାଇଁ ସମ୍ବେଦନଶୀଳ ନୁହେଁ । ଆଜି ଭାରତ ଏପରି ଏକ ସ୍ଥିତିରେ ଅଛି ଯେଉଁଠାରେ ଏହା କୌଣସି ବ୍ଲାକମେଲିଂକୁ ଭୟ କରେ ନାହିଁ ବୋଲି ସେ କହିଛନ୍ତି, ଯଦି ପାକିସ୍ତାନ ଭାରତ ବିରୋଧୀ ଗୋଷ୍ଠୀଗୁଡ଼ିକୁ ସମର୍ଥନ ଜାରି ରଖେ, ତେବେ ଆତଙ୍କବାଦ ବିରୋଧୀ ଅଭିଯାନରେ ଦେଶର "ନୂତନ ନୀତି’ ପାକିସ୍ତାନ ପାଇଁ ଏକ ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜ ସୃଷ୍ଟି କରିବ । ଭାରତର ରାଜନୈତିକ ନେତୃତ୍ୱ ଦେଶର ପ୍ରତିରୋଧ କ୍ଷମତାକୁ ମଜଭୁତ କରିବାର ଇଚ୍ଛାଶକ୍ତି ରଖିଛନ୍ତି । ଆଜିର ସମୟରେ ଆମର ପ୍ରତିରୋଧ ବହୁତ ଦୃଢ଼ । ଆମର ପ୍ରତିରୋଧ କାମ କରୁଛି ବୋଲି ସେ କହିଛନ୍ତି । ୨୦୧୯ରେ ଧାରା ୩୭୦ ରଦ୍ଦ ହେବା ପରେ ଜମ୍ମୁ ଏବଂ କାଶ୍ମୀରର ପରିସ୍ଥିତିରେ ଯଥେଷ୍ଟ ଉନ୍ନତି ହୋଇଛି । ଏହା ପରେ ରାଜନୈତିକ ସ୍ପଷ୍ଟତା ଆସିଛି । ଆତଙ୍କବାଦରେ ଏକ ବଡ଼ ହ୍ରାସ ଘଟିଛି ବୋଲି ସେ କହିଛନ୍ତି ।
