ଦୁଇ ଲୁଟେରା ଗିରଫ; ୨ଟି ବାଇକ ଜବତ
Jitendra Sahu
ଭୁବନେଶ୍ୱର, ୧୧ା୧୨ : ନୟାପଲ୍ଲୀ ବେହେରା ସାହି ନିକଟ ଏକ ସ୍ପୋର୍ଟ୍ସ ଦୋକାନ ସାମ୍ନାରୁ ବାଇକ ଚୋରି । ଅଭିଯୋଗ ପରେ ସିସିଟିଭି ଫୁଟେଜରୁ ଚିହ୍ନଟ କରି ଦୁଇ କୁଖ୍ୟାତ ଲୁଟେରାଙ୍କୁ ଗିରଫ କଲା ନୟାପଲ୍ଲୀ ଥାନା ପୁଲିସ । ସେମାନଙ୍କ ଠାରୁ ୨ଟି ଚୋରା ବାଇକ ଜବତ କରାଯାଇଛି । ଅଭିଯୁକ୍ତଙ୍କ ପୂର୍ବ ଅପରାଧୀକ ଯାଞ୍ଚ ବେଳେ ଜଣାପଡ଼ିଛି ଦୁଇ ଅଭିଯୁକ୍ତଙ୍କ ନାମରେ ପୂର୍ବରୁ ମଞ୍ଚେଶ୍ୱର ଥାନା, ବାଣପୁର ଥାନା ଓ ଟାଙ୍ଗୀ ଥାନାରେ ୫ଟି ଅପରାଧିକ ମାମଲା ରହିଛି । ପରେ ଦୁହିଙ୍କୁ ଆଜି କୋର୍ଟ ଚାଲାଣ କରାଯାଇଛି । ଗିରଫ ୨ ଅଭିଯୁକ୍ତ ହେଲେ, ଟାଙ୍ଗୀର ଦୁସ୍ମନ୍ତ ପ୍ରଧାନ ଓ ନାଚୁଣୀର ଜୟନ୍ତ ଜେନା ।
ସୂଚନା ଯୋଗ୍ୟଯେ, ଗତ ୧୧.୯.୨୦୨୪ ତାରିଖ ମଧ୍ୟାନ ପ୍ରାୟ ୧୨.୩୦ରେ ଅଭିଯୋଗକାରୀ କୁମାର ପ୍ରଳୟ ରଞ୍ଚନ ବେହେରା ସାହି ସ୍ଥିତ ବର୍ମା ସ୍ପୋର୍ଟ୍ସକୁ କିଛି ସ୍ପୋର୍ଟ୍ସ ସାମଗ୍ରୀ କିଣିବା ପାଇଁ ଯାଇଥିଲେ । ଏହି ସମୟରେ ତାଙ୍କ ବାଇକ ଟିକୁ ସ୍ପୋର୍ଟ୍ସ ଦୋକାନ ସାମ୍ନାରେ ରଖି ଭିତରକୁ ଯାଇଥିଲେ । ଏତିକି ବେଳେ କେହି ତାଙ୍କର ବାଇକକୁ ଚୋରି କରିନେଇଥିବା ବାହରକୁ ଆସି ଦେଖିବାକୁ ପାଇଥିଲେ । ପରେ ବହୁ ଖୋଜାଖୋଜି ପରେ ଦୋକାନରେ ଲାଗିଥିବା ସିସିଟିଭି କ୍ୟାମେରାକୁ ଚେକ କଲାବେଳେ ଜଣାପଡ଼ିଥିଲା ୨ ଜଣ ଲୁଟେରା ତାଙ୍କ ବାଇକକୁ ଚୋରି କରି ଫେରାର ହୋଇଯାଇଛନ୍ତି । ଏନେଇ ଅଭିଯୋଗକାରୀ ନୟାପଲ୍ଲୀ ଥାନାକୁ ଯାଇ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ମାମଲା ରୁଜୁକରି ତଦନ୍ତ ଚଳାଇ ଅଭିଯୋଗର ୩ ମାସ ପରେ ଆଜି ୨ ଜଣ ଲୁଟେରାଙ୍କୁ ଟାଙ୍ଗୀ ଓ ନାଚୁଣୀରୁ ଗିରଫ କରାଯିବା ସହ ସେମାନଙ୍କ ଠାରୁ ୨ଟି ବାଇକ ଜବତ କରାଯାଇଛି ।
