ଚିଲିକାରେ କମୁଛି ମତ୍ସ୍ୟ ଉତ୍ପାଦନ

ଏସିଆର ସର୍ବବୃହତ୍ ଲବଣ ହ୍ରଦ ଚିଲିକା ଏହାର ମନୋରମ ଦୃଶ୍ୟ ପାଇଁ ଯେଭଳି ବିଖ୍ୟାତ ଠିକ୍ ସେହିପରି ମତ୍ସ୍ୟ, କଙ୍କଡ଼ା ଆଦି କ୍ଷାରୀ ପାଣି ଖାଦ୍ୟ ଉତ୍ପାଦନ କ୍ଷେତ୍ରରେ ମଧ୍ୟ ସମଗ୍ର ଦେଶରେ ଏହା ବିଖ୍ୟାତ । ଚିଲିକା ଚିଙ୍ଗୁଡ଼ି କିମ୍ବା ଚିଲିକା କଙ୍କଡ଼ା କହିଲେ ସାରା ଭାରତରେ ପର୍ଯ୍ୟଟକମାନଙ୍କ ପାଟିରୁ ଲାଳ ଗଡ଼େ । ଚିଲିକାର ମତ୍ସ୍ୟ, କଙ୍କଡ଼ା, ଚିଙ୍ଗୁଡ଼ି ଆଦି ଉତ୍ପାଦନ କ୍ଷେତ୍ରରେ ଏହାର ତଟବର୍ତ୍ତୀ ଲୋକମାନେ ନିଜ ନିଜ ଭିତରେ ପ୍ରତିଯୋଗିତା କରି ଏସବୁକୁ ହ୍ରଦ ମଧ୍ୟରେ ଧରନ୍ତି । ଏହି ଘଟଣାକୁ ନେଇ ଗୋଷ୍ଠୀ ସଂଘର୍ଷ, ବୋମାମାଡ଼, ଗୁଳିକାଣ୍ଡ ଆଦି ଅନେକ କିଛି ଘଟେ । ଅତୀତରେ ଏ ପ୍ରକାରର ଘଟଣାକୁ ନେଇ ଚିଲିକା ପାଣି ଅନେକ ବାର ରକ୍ତାକ୍ତ ହୋଇଛି । ବର୍ତ୍ତମାନ ଦେଖାଯାଉଛି ଯେ ଚିଲିକାରୁ କଙ୍କଡ଼ା ଏବଂ ଚିଙ୍ଗୁଡ଼ି ଉତ୍ପାଦନ ଦିନକୁ ଦିନ କମୁଛି । ଏଭଳି କମିବାର ନିର୍ଦ୍ଦିଷ୍ଟ କାରଣ ଅନୁସନ୍ଧାନ କରାଯିବା ପୂର୍ବରୁ ମତ୍ସ୍ୟଜୀବୀମାନେ ଜଳବାୟୁ ପରିବର୍ତ୍ତନ ଏହାର ମୁଖ୍ୟ କାରଣ ବୋଲି ପ୍ରକାଶ କରିଛନ୍ତି । ଚିଲିକାରୁ ମାଛ ଧରିବା କ୍ଷେତ୍ରରେ କେତେକ ନିର୍ଦ୍ଦିଷ୍ଟ ନିୟମ ରହିଛି । ଜିରୋ ନେଟିଂ ମାଧ୍ୟମରେ ଚିିଲିକାରୁ କୌଣସି ପ୍ରକାରର ଜଳଜୀବ ଧରିବା ବେଆଇନ୍ ବୋଲି ସରକାର ଘୋଷଣା କରିଛନ୍ତି । ଜିରୋ ନେଟିଂର ଅର୍ଥ ହେଲା ଜାଲକୁ ମଶାରୀ ଜାଲ ଠାରୁ ଆହୁରି ସାନ କରି ମାଛ ଯେତେ ଛୋଟ ହେଲେ ମଧ୍ୟ ତାକୁ ଧରିବାର ବ୍ୟବସ୍ଥା । ଜାଲର ରନ୍ଧ୍ର ଛୋଟ ହେଲେ ସେଥିରେ ଛୋଟ ଛୋଟ ମାଛମାନେ ଧରାପଡିଯାନ୍ତି । ଏହା ଫଳରେ ସେମାନେ ବଡ଼ ହେବା ପର୍ଯ୍ୟନ୍ତ ସୁଯୋଗ ପାଆନ୍ତି ନାହିଁ କିମ୍ବା ଭବିଷ୍ୟତରେ ପ୍ରଜନନ କରିବା ଭଳି ଅବସ୍ଥାକୁ ଆସିପାରନ୍ତି ନାହିଁ । ଏହା ଫଳରେ ସେମାନଙ୍କର ବଂଶ ଲୋପ ହୋଇଯାଏ । ଏହି ଦୃଷ୍ଟିରୁ ଜିରୋ ନେଟିଂ ମାଛମରାକୁ ସରକାରୀ ଭାବରେ ବେଆଇନ୍ ବୋଲି ଘୋଷଣା କରାଯାଇଛି । କିନ୍ତୁ ମତ୍ସ୍ୟଜୀବୀମାନେ ଏହାକୁ ମାନୁନାହାନ୍ତି । ଏହା ଫଳରେ ପ୍ରାକୃତିକ ଭାବରେ ଚିଲିକା ପାଣିରେ ବଢ଼ିବାକୁ ଥିବା ମାଛ ବଢ଼ିବା ପୂର୍ବରୁ ଧରାପଡ଼ିଯାଉଛନ୍ତି । ତେଣୁ ଆସନ୍ତା ପୀଢ଼ି ସୃଷ୍ଟି ପାଇଁ ସେମାନଙ୍କର ସୁଯୋଗ ରହୁନାହିଁ । ଚିଙ୍ଗୁଡ଼ି ଉତ୍ପାଦନ କ୍ଷେତ୍ରରେ ସମୁଦାୟ ଚିଲିକାକୁ ସରୁ ଜାଲରେ ଘେରି କରି ଦିଆଯାଇଛି । ଏହା ଫଳରେ ଏକ ନିର୍ଦ୍ଦିଷ୍ଟ କ୍ଷୁଦ୍ର ଅଞ୍ଚଳ ଭିତରେ ଯେତିକି ମାଛ, ଚିଙ୍ଗୁଡ଼ି, କଙ୍କଡ଼ା ରହିଗଲେ ସେତିକିର ହିିଁ ଉତ୍ପାଦନ ହେବ । ଅର୍ଥାତ୍ ସେତିକିକୁ ଧରି ମତ୍ସ୍ୟଜୀବୀମାନେ ବିକ୍ରି କରିବେ । ଏହି ଘେରି ଭିତରେ ଥିବା ମାଛ, କଙ୍କଡ଼ା, ଚିଙ୍ଗୁଡ଼ି ଆଦି ଚିଲିକାର ମୁକ୍ତ ପରିବେଶ ଭିତରକୁ ଯାଇନପାରି ଆବଦ୍ଧ ହୋଇ ରହିଯାଉଛନ୍ତି ଏବଂ ପ୍ରଜନନକ୍ଷମ ହେବା ପୂର୍ବରୁ ଜାଲରେ ଧରାପଡ଼ି ମରିଯାଉଛନ୍ତି । ତେଣୁ ଆଗାମୀ ପୀଢ଼ିର ଜୀବଟିଏ ସୃଷ୍ଟି ହେବା ପୂର୍ବରୁ ତାର ବିଲୁପ୍ତି ହୋଇଯାଉଛି । ଏହି କାରଣରୁ ଗତ ୩ ବର୍ଷ ହେଲା ଏଠାରେ ବିଶେଷ କରି କଙ୍କଡ଼ା ଏବଂ ଚିଙ୍ଗୁଡ଼ିର ଉତ୍ପାଦନ କମି କମି ଚାଲିଛି । ୨୦୨୧-୨୨ ଆର୍ଥôକ ବର୍ଷରେ ଚିଙ୍ଗୁଡ଼ି ଉତ୍ପାଦନ ୬୭୬୨.୦୧୫ ମେଟି୍ରକ୍ ଟନ୍ ଉତ୍ପାଦନ ଥିବା ବେଳେ ୨୦୨୨-୨୩ ଆର୍ଥôକ ବର୍ଷରେ ଏହା ୬୩୨୭.୮୦୦ ମେଟି୍ରକ ଟନ୍ ଏବଂ ୨୦୨୩-୨୪ ବର୍ଷରେ ୬୦୩୮.୯୬୦ ମେଟି୍ରକ୍ ଟନ୍ ହୋଇଛି । ଏଥିରୁ ସ୍ପଷ୍ଟ ଜଣାପଡ଼ିଯାଉଛି ଯେ ବର୍ଷକୁ ବର୍ଷ ଚିଙ୍ଗୁଡ଼ି ଉତ୍ପାଦନ କମୁଛି । କଙ୍କଡ଼ା ଉତ୍ପାଦନ କ୍ଷେତ୍ରରେ ମଧ୍ୟ ୨୦୨୧-୨୨ ଆର୍ଥôକ ବର୍ଷରେ ୪୭୮.୭୦ ମେଟ୍ରିକ୍ ଟନ୍ କଙ୍କଡ଼ା ଉତ୍ପାଦନ ହୋଇଥିଲା । ୨୦୨୨-୨୩ ଆର୍ଥôକ ବର୍ଷରେ ଏହା କମି ୪୪୫.୧୬ ମେଟ୍ରିକ୍ ଟନ୍ ଏବଂ ୨୦୨୩-୨୪ ଆର୍ଥôକ ବର୍ଷରେ ୪୨୪.୭୧ ମେଟି୍ରକ୍ ଟନ୍ ଉତ୍ପାଦିତ ହୋଇଛି । ତେବେ ମାଛ ବ୍ୟବସାୟୀମାନେ ମାଛ ଉତ୍ପାଦନ କମୁଥିବା ମଧ୍ୟ ପ୍ରକାଶ କରନ୍ତି । ସେ ଯାହା ବି ହେଉ ଚିଲିକାରୁ ଜଳଜ ଖାଦ୍ୟର ଉତ୍ପାଦନ କମିବା ସ୍ଥାନୀୟ ମତ୍ସ୍ୟଜୀବୀମାନଙ୍କ କ୍ଷେତ୍ରରେ ଜୀବନଜୀବିକାର ଏକ ପ୍ରସଙ୍ଗ ହୋଇଥିବାରୁ ସେମାନେ ନିଜେ ସାମୂହିକ ଭାବରେ ସରକାରଙ୍କୁ ଅପେକ୍ଷା ନକରି ଏକ ନିଷ୍ପତ୍ତି ଗ୍ରହଣ କରିବା ଉଚିତ୍ ।